GEGURITAN

                                               LUMUNTURING BUDAYA

Tumetesing waspa dumlewer ing pangrasanku
Nglenthiring pandulu ginambar ing netraku
Ancluming prauan kawistara ing pasuryanku
Leleg trenyuh ginawa ing panggalihku
Amersani jaman siki
Tumpraping polah tingkahing putra lan putri
Kang wis ninggalake subasita
Nerak angger-anggering budaya
Lali ing tatakrama mbuwang sekabehing unggah-ungguh basa

Kabeh rumangsa nistha
Yen isih ngugemi pranatan budaya bangsa
Sanandyan jaman wis maju
Aja banjur dadi kleru
Crita leluhur ginubah sawiyah-wiyah
Busana owah samesthine
Tetunggangan, wisma, laladan rinepta beda saka asline

Apa kita wis ora ngregani budaya kita dewe?
Apa budaya kita wis ora ana ajine?
Apa budaya kita wis kedaluwarsa?
Apa budaya kita wis luntur?


Pemuda pemudi jaman saiki
Unggah ungguh basa wis dilirwakake
Tata krama wis ditinggalna
Tata wicara wis ninggalake subasita
Apa sing salah sekolah?
Apa sing salah bapak ibu?
Apa kabeh salah?
Nyatane budaya bnagsa wis ditinggalake
Wis arep luntur amerga polahe kita dhewe
 

GEGURITAN

                                                  NGOLAH RASA

Ening . . .
Ing antarane godhong-godhong
Kang obah katerak sumilire
Angin sing kanthi alon-alon   

Bebisik saranduning urip

 

Enengke cipta
Sawuse lakune raga
Ngeling-eling kanti wening
Sadawane dina sing kebacut kagawa
Kaseksen rembulan abang
Ing duwure wit klapa


Batinku miyak obahe wektu
Ngetung lakon lan panandang
Ndak rasa ing jiwa
Miyak grumbule ati
Kanggo nglari ing tembe buri
Supaya tan kena pati sejati
Tangan ngapurancang
Luh tumetes ing pipi
Nggetuni solah bawa
Kang kurang trapsila

“ Duh Gusti kang maha kuasa
Lumuntura sih pangapura
Dumateng kula menika
Engkang kebak dosa landuraka”

GEGURITAN

                                     NGAPURO

Mripatku kethap-kethip nyawang langit saka pinggir tendha

Lintang kang mung siji loro ora bisa gawe padhange wengi kang sepi

Gusti, amemuji sedaya naming kagem Panjenengan

Mugi paring paduko padhange margi

Nyawang clemloroting lampu seko nduwur gunung

Ngerasa awakku cilik temenan

Atiku ciut, kroso awakku digebyuri dosa

Atiku arep nangis koyo diiris-iris

Ngapuro Gusti…

Ngapuro…

Dalem namung tiyang kang lemah..

Kang boten saged mlampah piyambak..

Gusti..

Dalem namung tiyang ingkang gampil gripil..

Tansah kegoda kesenengan donya..

Gusti..

Hamung siji panyuwunku..

Tuntun dalem wonten ing margi kang padhang gusti..

GEGURITAN

IBU

Ibu . . .

Tresna asihmu
Ora ana kang bisa ngganteke
Kesabaran ibu kang kebak wutuh
Ora bisa daklaleke
Do’a ibu kang tulus
Tansah ngiringi awakku
Pengorbanan kang tanpa wates, ora bisa winales
Ibu . . .
Pituturmu bakal dakrungu
Tresna asihmu marang aku , ora bakal puput
Pandongaku ibu…
Muga Gusti tansah nyembadani

Ibu . . .
Lumintiring asihmu kadya cahya lintang ing angkasa,gumebyar gawe padhanging tyasmu…
Tan kendhat pudyamu,pepujimu kanggo aku
Lir pradipta rumeksa ing wengi,rinenggo pupus’ing rembulan
Ibu . . .
Kang kinasih kawelasanmu nyirna'ake sadhaya luptaku
Ibu . . .
Sewu atur ora bakal cukup,bandha donya ora bakal nutup katresnanmu marang aku
Ibu . . .
Aku bakal sregep lelaku,ngudi laku utomo,nyebar tresna marang sapadha,kanggo esem’mu kang ngebaki kalbuku

GEGURITAN

  PIWULANG

Jare simbah kula kudu sekolah
Kareben dadi bocah genah mrenah ora nggladrah
Jare rama ibu kula kudu sregep mangkat
Kareben dadi wong pangkat urip ora kesrakat mlarat
Jare bapak ibu guru kula kudu sinau tambah ilmu
Kareben kelakon kabeh kang tinuju


Nanging Prakanca,
Coba delengen kahanan nyata
Apa isih bisa pamulangan kang ana dadekake urip tumata
Pamulangan kang tanpa tuladha
Pamulangan kang kasatan piwulang
Pamulangan kang ngajarake angka-angka wuta siji lan siji ana pira?
Jare anut kang duwe kersa
Jan ora weruh subasita, trapsila, apa maneh tata krama lali dosa…
Kabeh lurung binarung kumalungkung pamrih pamuji siji
Pamulangan aweh pepadang

Simbah, Nyuwun pangapunten
Kula mboten kepingin dados dokter
Jalaran duite bapak mboten wonten sakoper
Rama, Nyadong duka
Kulo mboten kapilut drajat pangkat
Jalaran ajrih sumpahing rakyat
Kang panggah mlarat sekarat
Bapak ibu guru, Nyuwun donga pangestu
Mugi-mugi sedaya ilmu saged dados sangu